BACOLOD CITY — Hilway nga nakapauli ang tatlo ka mga mangingisda gikan sa ciudad sang Silay nga nagpautaw-utaw sa dagat matapos nagkulob ang ila bangka sa dagat kag na-rescue sang mga crew sang isa ka cargo vessel kahapon sang aga.
Una diri, nagpalawod ang mga mangingisda nga sanday Ramon Hiponia, Leo Tasio kag Joey Capangpangan gikan Sitio Cabug Baybay, Brgy. Guinhalaran, Silay City mga las-4:30 tinalikdan nga Marso 5 kag nakalab-ot ang mga ini sa kadagatan nga sakop na sang banwa sang Dumangas sa probinsya sang Iloilo.
Apang pagka-las 11:00 sang gab-i nagbaliskad ang ila bangka bangud sang mabaskog nga hangin kag balod apang maswerte nga wala nalumos ang mga ini kag nagkabit na lang sa katig tubtob nga naagyan sang cargo vessel nga LCT Our Lady of the Philippines mga las-5:50 sang aga (Martes).
Suno kay Lt. Senior Grade Jimmy Oliver Vingno, commander sang Coast Guard Station Bacolod gilayon nga nagpahibalo ang kapitan sang barko nga na-rescue sang mga ini ang nasambit nga mga mangingisda.
Pag-abot sa BREDCO Port sang mga ini, gilayon sila nga gincheck-up sang medical staff sang pantalan kag maswerte nga wala man sang mga pilas ang mga ini kag hilway nga ginpapauli.
