Gina-antisipar na sang MAGDALO Partylist nga makakas ang ila nga grupo sa listahan sang partylist group sang Commission on Elections (COMELEC).
Ini kasunod sang pagkakas sang COMELEC sang 50 ka mga partylist group.
Sa interview sang Bombo Radyo Bacolod kay former MAGDALO Representative Gary Alejano, nakahibalo siya nga delisted na ang MAGDALO bangod may rules sa partylist system kun sa diin makakas na sa listahan ang mga mapierde sa duha ka magkasunod nga eleksyon.
Aminado si Alejano nga mabudlay sa karun makasulod sa eleksyon bangod kwarta ang nagapadalagan, gani kompormi ini nga kinahanglan na sang election reform.
Luwas diri, pahayag sini nga kinahanglan nagid nga mapasar ang anti-dynasty bill bangod ginagamit na lamang sang mga political party ang partylist para mapasulod ang ila himata sa politika, bilang stepping stone sa target nga pagsulod sa mas mataas nga panggobyerno.
Samtang kabudlayan man sa partylist election ang paghimo sang iban sang mga partido nga nagareplicate lamang sa ila nga adbokasiya.
Dugang pa ni Alejano nga ang disbentaha sang MAGDALO sa eleksyon bangod ginpili nila nga magkampanya santo lang sa ila ikasarang.
Ini bangod indi nila luyag magpakaon sa systema sang pangurakot, kwartahanay, kag pagpamakal sang boto.
Dugang pa nga sila ang gindemonize ukon ginpakamalaot sang Duterte Administration.
Suno diri, ginadiskusyunan na sang MAGDALO ang liwat nga pagrehistro para sa 2028 Elections, apang bangod sila ang ginkakas na sa listahan kinahanglan naman nila nga bag-uhon ang pangalan sang partido.
Suno diri, priority bills sang Marcos Administration ang reporma sa Partylist System agud maseguro nga mahatagan gid sang tingog ang marginalized sector.
