Ginahanda na ang tatlo ka mga quarantine centers nga pagagamiton sang persons under investigation (PUIs), persons under monitoring (PUMs) kag mga pasyente nga luyag lamang magpakonsulta angot sa coronavirus disease 2019 (COVID-19 sa ciudad sang Bacolod.
Suno kay City Administrator Em Legaspi-Ang, mangin pilot center ang wala na gina-gamit nga eskwelahan nga South Hills Academy Center sa Barangay Alijis para sa mga PUMs.
Madumduman nga una na nga ginpahayag nga ang ECTS 1 kuntani ang pagagamiton apang nakabaton sila sang memorandum nagikan sa Department of the Interior and Local Government (DILG) nga indi pwede pag-usaron ang mga naga-operate pa nga eskwelahan.
Ang South Hills Academy Center ang may yara sang 17 ka mga hulot nga may dala na nga CR.
Nagpakig-angot naman sila sa Bacolod City Water District (Baciwa) agud mabalik ang koneksyon sang tubig.
Samtang, ang West Negros Integrated School sa Barangay Mandalagan Eroreco naman ang gamiton sang mga PUIs.
Suno kay Ang, mas maayo ini bangud malapit lang sa Queen Mercy Hospital nga sarang gid makabulig in kaso kinahanglanon.
Mangin respiratory center naman ang Bays Center kun sa diin diri pwede makakadto ang mga pasyente nga nagabatyag sang gamay lang nga pag-ubo kag sip-on ukon flu-like symptoms.
Suno kay Ang, nagaginutok na ang Emergency Room sang mga ospital sa ciudad.
Gani mas ginpakamaayo nila nga maghimo sang separado nga sentro para sa mga persona nga nagakabalaka kun sintomas na sang COVID-19 ang ila ginabatyag.
Ginalauman ni Ang nga mahitso na ang tatlo ka mga lugar sa sulod sang tatlo ka adlaw.
Dugang pa sini nga may yara pa sang pito ka iban nga mga sites nga posible idugang pananglitan nga magpasugot ang Department of Education (DepEd).
