BACOLOD CITY-Ginkompirmar sang Provincial Administrator sang Negros Occidental nga may yara na sang gina-endorso nga proposal nagikan sa contractor ang Office of the Governor tuhoy sa pagpang-utod sang 300 ka mga puno sang eucalyptus sa Panaad Park and Stadium.
Sa interview sang Bombo Radyo kay Atty. Rayfrando Diaz, may yara sang mga kontraktor nga nagpahayag sang interest sa proyekto kag ang una nga proposal ang nagikan sa Provincial Environment Management Office (PEMO).
Suno sa iya, P100,000 ang balor nga gintanyag sang kontraktor samtang P200,000 naman ang ikaduha nga proposal sini.
Bangud mas dako ang ikaduha nga offer kag mas makabenepisyo ang probinsya, suno kay Diaz, gina-endorso sa karun sang Office of the Governor ang ikaduha nga proposal.
Nahibaluan nga matapos matapas ang mga puno sang eucalyptus, islan ini sang mga endemic trees kag panamion ang landscape.
Gindugang man sang Provincial Administrator nga utdon ang mga kahoy antes ang Panaad Festival agud maghawan ang lugar kag mahatagan sang dako nga espasyo.
