BACOLOD CITY-36 ka mga barangay sa Negros Occidental kag duha sa Bacolod City ang gindeklarar nga “drug cleared” ukon “officially unaffected” sang Regional Oversight Committe sang Pebrero 27, 2020.
Nahibaluan nga 263 ka mga barangay sa bilog nga Western Visayas ang nag-apply para sa drug-clearing evaluation kun sa diin 111 ang nakapasar sang deliberation process.
Ginhatagan pagtamod ni Philippine Drug Enforcement Agency-Region VI (PDEA-6) Director Alex Tablate ang papel sang local government units (LGUs) sa madinalag-on nga deliberasyon sa mga kabarangayan kag gin-emphasize ang mga efforts sang Philippine National Police, Department of Health kag Department of the Interior and Local Government sa on-site validation process.
Suno sa PDEA, ang Western Visayas ang yara na sa 76.92% nga cleared sa illegal nga druga kun sa diin sa 4,051 ka mga barangay, 3,116 na ang gindeklarar nga drug-cleared.
Nagakalipay naman ang hepe sang Candoni Municipal Police Station bangud duha ka mga barangay nga nadeklarar nga drug-cleared sa nasambit nga nasambit nga banwa.
Sa interview sang Bombo Radyo kay Police Captain Richard Fajarito, ginpanginbulahan sini ang Brgy. Panga kag Brgy. Cabia-an bangud sila ang pinakauna nga barangay nga nadeklarar drug-cleared sa bilog nga Candoni.
Apisar sini, nagpasalig ang hepe nga padayon gihapon ang pagmonitor sang mga otoridad sa kada barangay.
Nagpanawagan man si Fajarito sa mga residente nga kun may yara sang makilal-an nga drug personality, gilayon ini nga ireport sa mga otoridad.
Ginakabig naman ni Police Major James Latayon, hepe sang Hinigaran Municipal Police Station man nga dako nga accomplishment para sa Hinigaran ang pagdeklarar man sang duha ka mga barangay sa banwa nga drug cleared.
Suno kay Latayon, ini bangud sa pagpangabudlay sang mga otoridad.
Suno sa iya, masami nga nagapatigayon sang pamulong-pulong ang mga pulis sa mga residente kag ginapaitsindi sa mga ini ang mga benepisyo kun madeklarar nga “drug cleared”.
Suno sa hepe, maayo na nga panugod ang duha ka barangay kag nagalaom ini nga matapna na ang illegal nga droga sa bilog nga banwa.
