BACOLOD CITY — Bag-o na ang station commander sang apat ka mga police stations sa ciudad sang Bacolod kasunod sang ginpatuman nga reshuffling.
Ini ang ginalakipan sang hepe sang Bacolod City Police Stations 3, 4 7 kag 10.
Suno kay Police Senior Supt. Jack Wanky, director sang Bacolod City Police Office, maga-schooling sa masunod nga inadlaw ang mga anay station commanders bangud kinahanglan ini sa ila promotion.
Apang samtang temprano pa suno kay Wanky, gin-islan na ang mga ini agud makapreparar ang bag-o nga hepe ilabi na sa security preparations bangud nagahilapit na ang MassKara Festival.
Si Police Senior Inspector Larry Teovisio sang Station 3 ang ginbuslan ni Police Senior Inspector Jun Ray Batadlan.
Nagbiya sa Station 4 si Police Senior Inspector Elmer Bonilla kag siya ang ginbuslan ni Police Chief Inspector Ritchie Gohee.
Apektado man sang relief order si Police Chief Inspector Charles Gever sang Station 7 kag siya ang ginbuslan ni Police Senior Inspector Ramil Sarona nga deputy chief sang Bacolod City Public Safety Company.
Samtang si Police Senior Inspector Ramel Bustamante sang Station 10 ang ginbuslan ni Police Senior Inspector Kim Zita nga anay pinuno sang Special Weapons and Tactics ukon SWAT sang BCPO.
