Patay ang mag-amay matapos nga masunog sa sulod sang ila puluy-an sa Purok Tuburan, Barangay Bacong ciudad sang Bago kahapon sang hapon.
Ginkilala ang biktima kanday Rolin Alapar, 24-anyos kag John Gabriel, 4-anyos.
Sa interview sang Bombo Radyo Bacolod kay P/Major John Joel Batusbatusan, hepe sang Bago City Police Station, nagaguwa sa imbestigasyon nga hungod nga ginsunog sang amay ang ila puluy-an kag luyag gid man sini nga maghikog.
Ginapahayag nga antes ang insidente, may ginbilin siya nga video sa tupad nila balay nga inug-pakita sa iya asawa nga nagatrabaho bilang domestic helper sa Saudi Arabia.
Suno pa kay Batusbatusan, ginpaguwa sang amay sa ila puluy-an ang iya bata apang sang nakita sang bata nga yara sa sulod sang nagakasunog nga balay si Alpar, nagdalagan man ini pasulod.
Himu sa light materials ang balay gani madasig ini nga ginlamon sang kalayo.
Makita sa crime scene nga ginahap-an sang amay ang bata.
Indi pa matumod sa karon kun ano ang rason sa paghungod sunog ni Alpar sa ila puluy-an apang ginalantaw nga motibo sang kapulisan nga posible may yara sang indi pag-intindihanay sa mag-asawa.
