Patay 40-anyos nga Assistant Department Manager sang Cebu Pag-Ibig Ayala Branch samtang pilason naman ang tatlo ka empleyado matapos aksidente nga mabunggo ang ginasakyan nga van sa puno sa kilid sang dalan sa Sitio Palao, Brgy. Malusay, Guihulngan City, Negros Oriental alas-1:40 kaina sang hapon, Hulyo 23.
Ang napatay ang residente sangTalisay City, Cebu samtang ang mga pilason naman ang ginlakipan sang 32-anyos, lalaki, single, empleyado sang Pag-Ibig Dumaguete Branch nga residente sang Brgy Batinguel, Dumaguete City, Negros Oriental kag 28-anyos nga babayi, single, employado sang Cebu Pag-Ibig Ayala Branch kag residente sang San Roque, Cebu City.
Samtang, ang driver sang van amo ang 59-anyos, kasado, designated driver sang Pag-Ibig Ayala Branch Cebu nga residente sang Camilla Homes Lawaan, Talisay City, Cebu.
Sa inisyal nga impormasyon, ang mga biktima ang nagabiyahe gikan sa Guihulngan Heights sa Sitio Palaw, Barangay Malusay padulong sa City proper. Matapos nagliko sa kurbada nga dalan hinali lang nga nadulaan sang preno ang van.
Sang natukiban sang driver ang depekto sa preno, ginpahibalo niya gilayon ang mga pasahero.
Bangud sini, isa sa mga pasahero ang nagtinguha nga maglumpat gikan sa van.
Apang, nadulaan na sang kontrol ang driver tubtob nga ini ang nabunggo sa puno sang lubi kag gemelina sa kilid sang dalan.
Bangud sa impact, ang driver ang nakaagom sang pilas lakip na ang mga pasahero.
Gilayon naman nga gindala sa ospital ang mga biktima para sa nagakaigo nga pagbulong apang ang 40-anyos nga pasahero nga nagapungko sa kilid sang driver ang gindeklarar nga dead on arrival.
Padayon ang imbestigasyon sang Guihulngan City Police Station angot sa insidente.
