Pilason ang 45 anyos nga tricycle driver sa ciudad sang Bago matapos malukpan sang palupok nga iya ginpulot.
Ang biktima ang ginkilala nga si Rex Gallendo, residente sang Purok Kamunsil, Barangay Sampinit, siyudad sang Bago.
Sa interview sang Bombo Radyo kay Police Major Ronald Santillan, deputy chief sang Bago City Police Station, hubog ang manghod sang biktima sang ini ang nagsindi sang palupok nga whistle bomb.
Nakita sang biktima nga malapit sa ila nga balay ang palupok, gani iya ini ginkuha agud kuntani ipalayo apang ini ang naglupok sa iya nga kamot.
Nag-agom sang pilas sa natuo nga kamot ang biktima nga sa karun nakaconfine na sa ospital.
Mensahe ni Santillan sa publiko para sa pala-abuton nga bag-ong tuig, nga mas maayo kun ini ang hiwaton nga wala sang palupok kag maggamit na lamang sang torotot ukon ano man nga butang nga makatuga sang kagahod sa pagselebrar sang bag-ong tuig.
