BACOLOD CITY — P4, 500, 000 ang kabug-usan nga cash incentives nga ginpanagtag sang provincial government sang Negros Occidental kadungan sang pasidungog nga ginhatag sa mga centenarians, Lunes nga adlaw.
Ini ang kadungan sang aktibidad may kaangtanan sa Cinco de Noviembre nga ginpatigayon sa lobby sang provincial capitol.
45 tanan ka mga centenarians ang ginpasidunggan kag bilang pagsunod sa Negros First Centenarians Act, sila ang ginhatagan sang P100,000 nga cash, magluwas sa plaque.
38 ka naga-edad sang 100 anyos pasaka ang nagtambong sa kahiwatan bangud post-humous award na ang para sa pito.
Ang mga centenarians ang ginalakipan sang lima nagikan sa Kabankalan, apat ka taga-Hinobaan, tag-tatlo sa Cadiz City, Hinigaran kag Cauayan.
May tag-duha naman nagikan sa Escalante City, Sagay City, Talisay, Bago, Valladolid, La Carlota, Binalbagan, Candoni kag Sipalay City samtang tag-isa naman sa San Carlos, Calatrava, Victorias City, Moises Padilla, Himamaylan City kag banwa sang Ilog.
Pinakatigulang sa ila ang naga-edad sang 105 anyos.
Nag-wish si Governor Alfredo Marañon Jr. nga magalawig pa ang kabuhi sang mga centenarians nga ginpasidunggan sang provincial government.
Sa speech ni Marañon, nagalaom ini nga magalawig man ang kabuhi sang iban pa gid nga mga pumuluyo.
Nagpanawagan man ang gobernador sa mga Negrosanon nga pangamuyuan ang mga centenarians nga madugangan pa gid ang tinuig sang ila kabuhi.
Naglahog pa ang amay sang probinsya nga hatagan sang provincial government sang isa ka milyon ka pesos nga cash incentive ang makalab-ot sa edad nga 120 anyos.
Isa sa mga nagbaton sang P100,000 si Tomas Espraguera, 100-anyos kag tumandok sang Escalante City.
Suno sa anak sini nga si Felicima Batayo, 60-anyos kag ikapito nga bata ni Tatay Tomas, 14 sila nga mag-utod.
Dose sa mga ini ang lalaki kag duha lang ang babayi apang nagkalamatay na ang iban.
Sang mapagros pa, si Tatay Tomas ang nagapanguma kag wala ini naga-inom sang alkohol kundi tuba lang.
Sa karon, nagalikit nalang sang dahon sang lumboy ang iya amay kag ginasigarilyo bilang kalingawan.