Opisyal na nagbukas ang Masskara Festival kun sa diin gin-umpisahan ini sang motorcade gikan sa dalan Araneta sa Barangay Sincang-Airport kahapon.
Ang motorcade ang gin-updan sang festival sponsors.
Wala man nakapugong sa ginpatigayon nga Grand Salubong sa Masskara Festival ang pagpanalithi.
Madamo nga mga Bacolodnon kag mga pumuluyo nga nagikan sa nagkalain-lain nga bahin sang probinsya ang nag-upod sa ginpatigayon nga Grand Salubong.
Ginpangunahan ni Bacolod City Mayor Alfredo “Albee” Benitez ang pagbukas sang 45th MassKara Festival.
Sa mensahe sang alcalde, ginpasalamatan sini ang Bacolod Yuhum Foundation kag ang tanan nga nagbulig agud nga matigayon ang pagselebrar sang Bacolod Masskara Festival 2024.
Luyag man sini nga mag-enjoy ang tanan bangud madamo sang nakalinya nga mga aktibidad para sa selebrasyon subong nga tuig.
Samtang, gindagsa sang kapin 45,000 ka indibidwal ang MassKara Grand Countdown Salubong kagab-i sa Bacolod City Government Center (BCGC).
Nangin madinuagon ang gab-i bangud sa dance performances, games, local bands kag presentasyon sang Miss Bacolod Masskara sa pila ka oras nga programa.
Madamo ang nag-enjoy kag nagsabay sa pagkanta sang nagperform ang mga kilala nga pop-rock band nga December Avenue.
Ginkanta sang mga ini ang pila sa ila nga mga hit songs nga ginalakipan sang Dahan, Eroplanong Papel, Kung ’Di Rin Lang Ikaw, Sa Ngalan ng Pag-Ibig, kag Bulong.
Nag-upod sa Grand Salubong sang nasambit nga kapiyetahan sanday Bacolod City Lone District Congressman Greg Gasataya, Councilor Israel Salanga, Councilor Vladimir Gonzalez, Councilor Cindy Rojas, Councilor Simple Distrito, Councilor Celia Flor, Councilor Thaddy Sayson, Councilor Claudio Puentevella, Councilor Jason Villarosa, Liga ng mga Barangay President Lady Gles Pallen kag anak ni Mayor Albee nga si Victorias City Mayor Javi Benitez.
Yara man sanday Bacolod MassKara Festival chairman Jojie Dingcong; President and Festival Director for Finance, Admin, Concerts, Events, and Fair, Kuster Y. Cadagat; Secretary and Festival Director for Cultural and Accredited Events, Jericho Redil, Treasurer, and Festival Director for Good Governance, Finance, Procurement, and Admin; Food Committee Chairperson Ana Tison; kag Tourism Officer Tere Manalili.
Apisar nga madamo ang mga tawo, wala man nakarecord ang mga kapulisan sang mga untoward incidents.
