Patay ang isa ka 48-anyos nga lalaki matapos nga ginluthang sa Prk Sigay, Brgy. 2, Bacolod City kagab-i.
Ginkilala ang biktima kay Norman Sola, 48-anyos kag residente sang amo nga lugar.
Sa interview sang Bombo Radyo Bacolod kay P/Capt. Leo Estopa, hepe sang Bacolod Police Station 2, ginpahayag sini nga samtang papauli ang biktima upod ang tatlo sini ka mga kaupdanan, hinali nalang ini nga gintupadan sang babayi kag may nagtiro dayon sa iya.
Suno kay Estopa, gilayon nga nakapalagyo ang wala makilal-an nga suspetsado.
Samtang, ginhingagaw naman dala sa Corazon Locsin Montelibano Memorial Regional Hospital si Sola apang gindeklarar nga dead on arrival.// Padayon pa karon nga ginahibalo kun sa diin ini naigo sang bala.
Nahibaluan nga isa ka tokhang surrenderer ang biktima.
Sa karon padayon pa ang imbestigasyon sang kapulisan angot sa insidente.
