BACOLOD CITY-Malapit sa P200,000 ang balor sang suspected drugs nga narekober sang kapulisan sa buybust operation sa Purok Tahong, Brgy. 2 sa ciudad sang Bacolod kaina sang kaagahon.
Arestado sa operasyon sang Police Station 3 ang subject nga si Mary Therese “Maymay” Espaltero kun sa diin nakuha diri ang P162,000 nga balor sang suspected shbau.
Magluwas kay Espaltero, naaresto man si Eric John Tam sang Brgy. Alijis, Bacolod City.
Nabakal bilang buybust item ang isa ka elongated sachet sang suspected shabu kabaylo sang P500.
Dugang naman nga narekober sa operasyon ang isa pa ka elongated kag duha ka big sachets sang suspected shabu kag coin purse.
Sa kabug-usan, nagabug-at sang 13 grams ang suspected shabu nga narekober.
Todo panginwala naman si Espaltero sa kaangtanan sa iligal nga druga kag ginpanginwala man sini nga kilala niya si Tam.
Samtang indi naman maghambal si Tam kun nga-a yara siya sa lugar sang ginpatigayon ang operasyon.
Samtang magluwas sa duha, naaresto man si Edwin Jimena Jr. bangud nakuhaan ini sang armas.
Indi kuntani kabahin sang buybust si Jimena ugaling sang naglabay ini sa lugar, nakita ini nga may bitbit nga cal. 38 nga armas nga may pito ka mga bala.
