Patay ang 50 anyos nga babayi matapos maligiran kag mapintalan sang dako nga bato sa Brgy Jandalamanon, Ayungon, Negros Oriental pasado alas-3:30 kahapon sang hapon.
Sa interview sang Bombo Radyo Bacolod kay Engr. Derrick Chavez, head sang Ayungon Municipal Disaster Risk Reduction and Management Office, bangod wala sang signal ang lugar, ang Punong Barangay ang nagbyahe pa padulong sa ila opisina agud ireport ang insidente.
Naghingagaw man ang mga ini sa paglaom nga maabtan nga buhi ang biktima.
Apang bangod malayo ang lugar, nagdangat pa sa 30 tubtob 35 minutos ang ila ginbyahe agud makalab-ot sa Barangay Hall sang Brgy Jandalamanon.
Apang gikan diri, kapin 1.5 km pa ang kinahanglan nga lakton pasaka sa lugar sang biktima.
Naabtan nila ang biktima nga wala na sang kabuhi, kag napintalan ang lower extremities gikan sa hawak panaog sang tuman ka dako nga bato.
Nahibaluan nga malapit lang ang balay sang biktima gikan sa ginluntaran sang aksidente, samtang madamo sang mga bato sa banglid nga area nga kun lantawon sarang magcollapse sa gamay lamang nga pagtandog.
Suno kay Chavez, nakita nila nga gintandog sang babayi ang bato, rasun kun ngaa ini ang nalukat kag nagligid padulong sa iya.
Nabudlayan pa sila sa pagkuha sang lawas, bangod kun ini ang ila paligiron panaog mahimo malasakan sang bato ang ulo sang biktima.
Gani kinahanglan pa nila nga itulod pa-ibabaw ang bato agud maredirect ang dereksyon kag natigayon nga nakuha ang lawas pasado alas-5:50 na sang hapon.
Ginapakamaayo man nila nga madamo sang nagbulig, nga nagdangat sa 30 tubtob 40 ka pumuluyo.
Pahanumdom sini sa mga pumuluyo nga malapit sa kaangay nga mga area nga likawan nga tandugon ang dalagko nga mga bato agud indi matabo ang kaangay nga rockslide.
