Luwas na ang anom ka pasahero sang nagkulob nga motorbanca sa baybayon sang Sitio Roma, Brgy. Batia, EB Magalona, Negros Occidental, adlaw sang Lunes.
Sa interview sang Bombo Radyo Bacolod kay Second Class Michael Quebrar, Commander sang Philippine Coast Guard Victorias City Sub-Station, ginpahayag sini nga alas 11:20 sang aga sang nakabaton sila sang report nga may nagkulob nga bangka gani gilayon man naghimos ang PCG kag PCG-Auxiliary agud magresponde.
Sakay sa motorbanca nga MV Gemma ang anom ka pasahero nga ginkilala kanday Ma. Andrea pahilanga 29 yrs old; Rubin Pahilanga, 67 anyos; Sigundina Andres, 85 anyos; Claudine Andres, 25 anyos; Rey Tupas kag isa katatlo ka tuig nga bata.
Lunsay magparyentihanay ang mga pasahero.
Nagkulob ini bangud sa dalagko nga balod tuga sang mamadlos nga hangin kag maayo lamang nga nakita ang mga ini nga nagalutaw-lutaw sang mga pasahero sang MV Jay-ar nga naglabay sa lugar sa diin nagkulob ang bangka nga gilayon man nga nagbulig sa mga ini agud maluwas.
Suno kay Quebrar, nagikan sa Barangay Manta-angan ang mga biktima agud magkuha sang talaba apang pagbalik na sang mga ini sa Brgy. Batia, nagkulob na ang ginasakyan nga bangka sang mga ini.
Wala man sang nasamaran sa natabo kag yara na sa karun sa maayo nga kahimtangan ang mga biktima.
