Anom ang kumpirmado nga patay samtang 15 ang pilason matapos gin-igo sang kilat sa Sitio Baras-barasan, Brgy. Manlocajoc ciudad sang Sipalay pasado ala-1:00 kaina sang hapon.
Nahisayran nga nagapasilong sa idalom sang truck sa idalom sang puno sang kahoy sa tunga sang kampo sang tubo ang mga biktima sang gin-igo ang mga ini sang kilat.
Suno kay Punong Barangay Cyrus Debuyan sang Brgy. Manlocajoc, magpamilya ang mga biktima.
Gilayon nga gindala ang mga biktima sa City Health Office sang Sipalay apang gindeklarar nga patay ang anom sa ila samtang ang 15 ka mga pilason ang gindala naman sa Merceditas District Hospital.
Ginkilala ang mga nagkalamatay nga sanday Mariel Montecino, Mary Tino, Arvinel Seminion, May Ann Seminion, Rose Ann Seminion kag Charlene Seminion.
Ang mga pilason ang mga lunsay may apelyido nga sanday Eric, Ronela, Aira, Alvin Roy, George, Wilma Fe, Alma, Ronalyn, Ryan kag Nia.
Pilason man sanday Roy Balancas, Ryan Balansac, Nelson Sipaway kag Wilma Montecino.
Una na nga ginpahayag ni Councilor Dionilo Bugtae, nga yara na sa estable nga kondisyon ang mga ginsaylo sa Merceditas District Hospital samtang gindala naman sa isa ka hospital sa Bacolod ang kritikal nga si Lolina Seminion.
Ang pila sa mga pilason sa nasambit nga district hospital ang nakangkun sang paso kag nagapalaminhod ang lawas apang halos indi pa ma-istorya bangud sang trauma.
Suno pa kay Councuilor Bugtae, sabton sang ciudad ang gasto sa paghikot sa bangkay sang mga biktima, nahatagan naman sang inisyal nga bulig ang mga pilason kag may gin paupod man ang city government nga tawo sa kritikal nga ginadala sa Bacolod.
