Magafile ang 60 ka mga empleyado sang Bacolod City Water District sang apelasyon sang Civil Service Commission (CSC) batok sa termination sa ila sa trabaho.
Madumduman nga kahapon sang aga, wala ginpasulod ang 60 ka mga empleyado nga nakabaton sang order nga ginpagwa ni Baciwa acting general manager Engr. Michael Soliva sadtong Disyembre 29, 2020.
Nahibaluan nga nakasaad sa Memorandum Order No. 2020-081 nga ginadumilian na ang 60 ka mga empleyado sang Baciwa nga magtiner sa tagsa nila ka mga opisina kasunod sang Board Resolution No. 172 nga nagadeklarar sang ila posisyon nga “redundant” rason sang “separation of service” ukon pagkakakas sa trabaho.
Sa interview sang Bombo Radyo kay Atty. Rey Gorgonio, collaborating council sang terminated union members, siya ang maga-assist sa mga empleyado sa pagpasaka sang appeal.
Suno kay Gorgonio, ang ginpangterminate nga mga empleyado ang may yara sang collective negotiation agreement sa BACIWA kag joint venture agreement man lang ang yara sa tunga sang Prime Waters Inc. kag water district gani naga-exist gihapon ang duha ka korporasyon.
Nagapati man ini nga indi transparent ang mga board of directors sang BACIWA tuhoy sa terminasyon sang 60 ka mga empleyado kag daw kaangay na lang nga ila gin-ako nga ginprivatize gid man ang water district.
Gin-athag man sini nga ang “redundancy” ang nagakatabo lamang sa mga pribado nga kumpaniya kag indi ini epektibo sa mga napaidalum sa civil service commission.
Suno diri, nagbayolar gid ang right of security to tenure sang mga empleyado gani mag-apelar sila sa CSC.
