653 ka mga Bacolodnon ang inisyal nga nakabatun sang tig-P2,000 cash sa idalom sang one-time financial assistance nga Unified Package for Livelihoods, Industry, Food, and Transport (UPLIFT) program sang Department of Social Welfare and Development (DSWD).
Ang payout ang ginfacilitate sang Department of Social Services and Development (DSSD) – Bacolod City sang Hulyo 30 kag 31.
Sa interview sang Bombo Radyo Bacolod kay DSSD-Bacolod Head Dr. Ricthell Verdeprado Mangga, ini ang una pa lamang nga batch kun sa diin ang mga benepisyaryo amo man ang mga nakabatun sa nakaligad nga Walang Gutom Program sang DSWD.
Ginalauman nga sa masunod nga bulan, mapagwa na ang listahan sang mga pumuluyo nga makabatun sang tig-P2,000 kada bulan sa sulod sang anom ka bulan.
Ginklaro naman ni Mangga nga indi ciudad sang Bacolod ang nagpili sang mga mahatagan, kaangay sang sala nga huring-huring nga nagalapta, sa baylo ang benepisyaryo ang nakabase sa Community-Based Monitoring System (CBMS) ukon data base kun sa diin nakarecord ang national census agud matumod kun sin-o ang makonsiderar nga poorest of the poor.
Ang CBMS man ang gingamit sa pagpili sang mga benepisyaryo sa Walang Gutom Program kasubong man sa Pantawid Pamilyang Pilipino Program (4Ps).
Nahibaluan nga madamo sang mga nagapamangkot kun sa diin makapalista, kag may mga alegasyon pa nga ginapili lamang ukon palapit sa luwag ang pagkuha sang benepisyaryo.
Ginaklaro ni Mangga nga sila ang nagabatun na lamang sang listahan nga amo ang ila ginapahibalo sa schedule sang payout.
