Ginabasol sang madamo nga mga residente sa California, USA sa US government ang nagaluntad nga wildfires.
Sa interview sang Bombo Radyo Bacolod kay Allan Mandid, Bombo International News Correspondent derekta sa Orange County, California, sila ang halos 40 minutos lamang ang kalayuon sa Pacific Palisades, nga tuman nga naapektuhan sang wildfires.
Ang Pacific Palisades ang napatung0an sang Malibu kag Sta. Monica, nga ginapuy-an sang madamo nga prominente nga mga indibidwal kaangay sang mga celebrities kag movie directors.
Sa karun malapit naman nga malab-ot sang kalayo ang Vine Street kag Hollywood Boulevard kun sa diin makita ang famous nga Hollywood Walk of Fame.
Ang lugar ang ginakahangaw-an nga malab-ot bangod sa dalagko nga mga establishimento kag film industry nga maulamid.
Sa karun madamo naman sang mga million dollars mansion ang ginlamon na sang kalayo.
Suno kay Mandid, gin-ako mismo sang California Governor nga wala nila napreparahan ang kaangay kadako nga kalamidad.
Pahayag sini nga naforecast na ang mabaskog nga Santa Ana winds, nga masami mabatyagan halin Nobyembre tubtob Pebrero.
Apang wala nila malauman nga magadangat sa 100 miles per hour ang kabaskugon sang hangin nga sarang makatumba bisan sang truck, nga amo ang nagpadasig pa kag nagpabaskog sang wildfires.
Ang wildfires ang naglawig na sang halos tatlo ka adlaw, kag ginapakamaayo na lamang ni Mandid nga ini ang nagtulutahaw na sa 30 tubtob 50 miles per hour.
Apang sa karun, ang kalabanan nga ginabasol amo ang US government bangod sa pag-aprubar sang gamay nga pondo apisar nga ini ang tuigan na nga kalamidad.
Kalakip kuntani sa proposal ang paghire sang oncall firemen, agud madasig nga mapalong ang kalayo.
Dugang pa nga wala man nagstore sang tubig sa tion sang tig-ululan sa desert state, gani sa isa ka libo nga fire hydrant, 200 gid ang wala sang unod nga tubig, kag kalabanan sa mga ini ang yara sa pinakamalala nga nahalitan sang wildfires.
