Pito ka tuig nga bata nga lalaki nga naghampang sang lighter ang ginalantaw rasun sa nagluntad nga sunog sa Prk Lampirong compound sa Brgy 2, Bacolod City kahapon.
Sa interview sang Bombo Radyo Bacolod kay Fire Superintendent Jenny Mae Masip, Fire Marshal sang Bacolod City Fire Station, naggwa ang mga ginikanan sang bata gani ini lamang ang nabilin sa balay sang siya ang maghampang sang lighter.
Sang mag-umpisa na ang kalayo, ini ang naggwa man sa balay kag nagpangayo sang bulig sa mga kaingod.
Apang bangod sa human sa light materials ang kalabanan sa mga balay kag naga inikit-ikit, nga nadugangan pa sang mahangin nga panahon, gani madasig nga naglapta ang kalayo.
29 ka mga balay ang nahalitan sang sunog nga ginalakipan sang 20 ka totally damaged kag siyam nga partially damaged.
Nagdangat naman sa 2nd alarm status ang sunog.
Suno kay Masip, ang kabug-usan nga kahalitan ang nagdangat lamang sa 1,185 square meters kag ang balor ang ginabanta yara sa P296,250.
Wala man sang may nareport nga napatay ukon nasamaran, luwas sa apat ka mga ido, kun sa diin ang isa ang malala ang sitwasyon.
Panawagan ni Masip sa mga pumuluyo nga likawan nga ibilin nga sila lamang sa mga balay ang mga magagmay nga kabataan, bedridden kag mga persons with disability (PWD) nga wala sang nagakaigo nga mental condition nga magpaminsar sa pagsalbar sa kaugalingon.
Kasubong man nga dapat isecure nga indi malab-ot sang mga kabataan ang mga butang nga makatuga sang sunog kaangay sang lighter, posporo kag kandila.
