BACOLOD CITY – Nagkalain-lain nga kaso ang atubangon sang isa ka iloy nga suspetsado sa pagbaligya sang hingalit nga kalipay sa mga foreigner gamit ang kaugalingon nga mga anak kag iban pa nga mga bata pinaagi sa cybersex sa ciudad sang Bacolod.
Huwebes sang hapon, narescue sang mga pulis ang anom ka mga menor de edad kag isa ka dalaga sa cybersex den sa Barangay 26, Bacolod City kun sa diin nadakpan man ang suspetsado nga iloy sang isa sa mga menor nga biktima.
Suno sa Women and Children Protection Center – Visayas nga amo ang nagpatigayon sang operasyon, gina-exploit sang 35-anyos nga suspetsado ang duha ka mga anak sini nga may edad duha kag lima ka tuig.
Sang ginpatigayon ang entrapment operation, nadakpan sa akto ang suspetsado nga ginatanyag ang lima ka tuig nga anak nga magapatigayon sang sexual act kabaylo sang P1, 000 tubtub P25, 000.
Apang magluwas sa iya mga anak, ginagamit man sang suspetsado sa cybersex ang duha ka mga hinablos sini nga naga-edad 17 kag 22; kag anak sang mga tupad-balay nga naga-edad lima, 14 kag 16.
Suno kay Police Senior Supt. Jack Wanky, director sang Bacolod City Police Office, foreigners ang kustomer sang suspetsado nga nagabayad pinaagi sa money remittance.
Suno naman kay Bacolod City Department of Social Services and Development head Pacita Terro nga nag-upod man sa operasyon, yara sa karun sa ila nga kustodiya ang anom ka menor de edad samtang ginpahanugutan naman nga makapauli ang 22-anyos nga dalaga.
Ginahanda naman ang kaso nga violation sang Cybercrime Law, Child Abuse kag Anti-Trafficking in Person batok sa suspetsado samtang magapatigayon naman sang stress debriefing para sa mga biktima ang DSSD.
