Ginabulong pa sa ospital ang walo ka mga persona nga napilasan kasunod sang pagbungguanay sang Ceres bus, isa ka tricycle kag isa ka motorsiklo sa ciudad sang Victorias kahapon sang hapon.
Suno kay Police Captain James Alfredo Javellana, traffic investigator sang Victorias City Police Station, apat tanan ang sakay sa tricycle nga ginamaneho ni Junie Rojero sang Barangay 20, Victorias kag apat man ang sakay sa motorsiklo nga ginamaneho ni Wilford Cañete sang Canetown Subdivision, Barangay 19-A, Victorias City sang natabo ang aksidente.
Nagahulat kuntani ang mga ini nga makatabok sa Crossing Central, Barangay 13, Victorias City sang nabungguan sang Ceres bus nga ginamaneho ni Cris Jun Impase sang Iloilo City apang temporaryo nga nagapuyo sa Victorias City.
Padulong sa Victorias ang Ceres bus nga may ruta Bacolod-Victorias.
Wala sang napilasan sa mga pasahero sang Ceres bus apang lunsay napilasan ang mga sakay sa tricycle kag motorsiklo kag padayon pa nga ginabulong sa ospital sa Bacolod.
