Walo na ang reported nga napatay sa Mindanao bangud sa malain nga panahon, suno sa report sang National Disaster Risk Reduction and Management Council (NDRRMC).
Sa ulihi nga report sang ahensya, ang Tropical Cyclones Carina kag Butchoy, kasubong man ang Southwest Monsoon ukon ang Hangin Habagat, ang naga-apekto sa pila ka bahin sang pungsod.
Pito diri ang nakumpirmar nga patay na kag lunsay ang nagikan sa Mindanao, apat diri ang nagikan sa Zamboanga kag tag-isa ang nagikan sa Northern Mindanao, Davao, kag Bangsamoro Autonomous Region in Muslim Mindanao (BARMM).
Suno sa NDRRMC, ginavalidate pa ang isa sa ginreport nga napatay ang nagikan sa BARMM.
Apat sa mga biktima ang napatay bangud sa trauma ukon suffocation bangud natampukan kasunod sang landslide sa duha ka sitios sa Barangay Pamucutan, Zamboanga City.
Ang bangkay sang isa sa walo ka reported nga napatay nga nagikan sa Maramag, Bukidnon, ang nasapwan sa Pulangi River sa Kabacan, North Cotabato.
Samtang, dugang pa sang NDRRMC ang mga tawo nga una na ginreport nga nasamaran kag ginadala sa Jose Abad Santos, Davao Occidental matapos nga magtabok sa suba nga may mabaskog nga current ang napatay man.
Wala naman nakabutang sa report sang nasambit nga ahensya ang rason sang kamatayon sang iban nga fatalities.
Samtang, isa ang nagapabilin nga missing kag duha ka mga tawo ang reported nga nasamaran sa Northern Mindanao bangud sa malain nga panahon.
