Padayon nga nagapaayo sa ospital ang lima ka miyembro sang pamilya nga nasamaran sa nagluntad nga aksidente sa Sitio Tumampon, Barangay Tiguib, Ayungon, Negros Oriental sang Sabado sang aga.
Sa interview sang Bombo Radyo Bacolod kay Police Lt. Stephen Polinar, spokesperson sang Negros Oriental Police Provincial Office, ang anum ang una na nga gindeklarar nga dead on arrival kag may duha nga nagdugang.
Suno kay Polinar ang lima ang nagapabilin sa Bindoy Hospital para sa pagpabulong.
Una na nga ginpahayag ni Police Master Sergeant Jhunren Gargoles, chief investigator sang Ayungon Municipal Police Station, 13 ka miyembro sang pamilya ang sakay sang multicab nga mapadulong kuntani sa patyo.
Iban sa ila nagikan pa sa ciudad sang Dumaguete kag Manila nga nagpauli sa probinsya para magselebrar sang death anniversary sang ila himata kag para sa paskwa.
Nadulaan sang preno ang multicab samtang nagabyahe sa dulhogon nga dalan kun sa diin nagbaliskad ini kag nagtupa sa batohon nga area.
Dead on the spot ang mga biktima nga sanday Edwin Deguit Sr.; Zenaida Sabanal; Libby De Jesus, 71 anyos; Ernesta Villasco; Anabelle Devero; kag Elphy Deguit, 46 anyos, nga nagatrabaho bilang Barangay Health Worker (BHW).
Apang, sang hapon, napatay si Chinly Magalso, 42 anyos kag ang 13 anyos nga babayi nga lunsay yara sa kritikal nga kondisyon.
Padayon naman sa karun nga ginabulong ang lima pa ka miyembro sang pamilya kalakip na ang driver nga si Juan Maratas, 56 anyos nga residente sang Barangay Bagacay, Dumaguete City.
