Naghatag sang mensahe si Bacolod City Mayor Greg Gasataya sa pagsaulog sang Araw ng Kagitingan subong nga adlaw, Abril 9.
Nagtipon kaina sang aga ang pila ka mga uniformed personnel, city employees, veterans kag mga Boy Scout of the Philippines sa Bacolod City Government Center grounds sa pagselebrar sang 84th Araw ng Kagitingan.
Suno sa Alkalde, ang tema nga “Giting ng bayani, pamana sang salinlahi” ang nagapahanumdom sang kaisog kag dedikasyon sang mga lider kag baganihan sang una, nga tubtob sa subong ginapadayun sa gihapon sang mga pumuluyo sa pag-atubang sang nagkalainlain nga krisis sang pungsod.
Suno kay Gasataya, ang mga naagyan sang una nga henerasyon ang nagapakita nga ang mga Pilipino, ilabi na ang mga Bacolodnon ang may yara sang ikasarang nga magbangon kag mag-atubang sang bisan ano pa nga problema.
Dugang pa sini, ang padayon nga paghatag sang serbisyo sa publiko sa gobyerno, padayon nga pag-eskwela sang mga estudyante kag patinguha sang tagsa ka pamilya kag mga transport sectors ang nagapakita sang pagkamaisog.
Nagpasalamat ang alkalde sa national government sa padayon kag madasig nga paghatag sang bulig sa mga local government sa subong nga krisis.
Ginpaathag sini ang importansya sang pagbinuligay, bangud suno diri, kun padayon ang pabinuligay sang isa kag isa kag magasalig sa Ginoo, wala sang krisis nga indi malampuwasan.
