BACOLOD CITY — Dako ang bulig sang komunidad sa isla sang Suyac sa ciudad sang Sagay rason nga ginkilala ini sang Association of Tourism Officers of the Philippines – Department of Tourism (ATOP-DOT).
Grand Winner ang Suyac Island Journey: Coastal Communities Resources Advocacies to Boost Sustainability para sa Best Practices on Community-based Responsible Tourism Category sa ATOP-DOT Pearl Awards subong nga tuig 2017.
Ang isla sang Suyac ang nahamtang malapit lamang sa pantalan sang Barangay Old Sagay sa Sagay City.
Sa exclusive interview sang Bombo Radyo kay Negros Occidental Provincial Tourism Officer Cristine Mansinares, mahina sang una ang solidwaste management sa lugar apang bangud manggaranon ini sa marine resources, gintinguhaan sang city government sang Sagay nga ini ang mapatahom.
Pinaagi sa tourism development plan sang ciudad, natinluan kag nadevelop ang isla sang Suyac kag nangin tourist attraction bangud sa mga tigulang na nga mangroves, pispis kag kulunaknit.
Magluwas diri, gin-empower man sang city government ang komunidad sa lugar rason nga sila na mismo ang nagapadalagan sang local enterprise kag sila ang naga-income.
Sa pihak nga bahin, gindayaw man sini ang ciudad mismo sang Sagay nga gindeklarar Grand Winner sa Best Tourism Month Celebration-City Category.
Suno kay Mansinares, ginapaintra sang city government ang lokal nga komunidad sa ila nga selebrasyon sang tourism month, indi pareho sa iban nga LGU lang ang nagasaulog.
Bangud sini, handom sang probinsya nga mangin hall of famer naman ang Sagay City sa masunod nga tinuig.
