BACOLOD CITY — Nagakabatyagan na sang mga magagmay nga naga-tiangge ang pagsaka sang presyo sang pila ka mga balaklon partikular ang sigarilyo kag softdrinks sa pagsugod gid sang bulan sang Enero bangud sang pagpatuman na sang Tax Reform on Acceleration and Inclusion (TRAIN) Act.
Suno kay Gitching Delmo sang Purok Sigay, Brgy. 2 kag duha na ka tuig nga naga-tiangge sa kilid sang Bacolod City Police Station 2 tuman kadako ang gin saka sang presyo sang mga softdrinks kag sigarilyo.
Suno diri, ang sigarilyo nga sang una mabakal lang sang P50 ang isa ka kaha, subong nagabalor na sang P65.
Ini man ang rason kun nga-a wala na lang ini nagabakal sang mas mahal pa gid nga malapit na sa P100 ang kaha bangud nga nagareklamo naman ang mga customer sang tuman ka mahal nga presyo.
Sa bahin naman sang softdrinks, ang mabakal sang una sa tag-P196 lang ang kaha, subong nagsaka na sa P250 gani nga ang isa ka botelya nga sarang lang mabakal sang nagligad sang P10, subong ginabaligya na sa tag-P12.
Bangud sini, ang sang una ginakita ni Delmo nga P1,500 kada adlaw, nagnubo na ini subong sa P1,000 ukon kaisa mas nubo pa gid sa P900.
