BACOLOD CITY – Na-upset ang mga residente sa Hawaii, USA matapos nakabaton sang mensahe nga iguon sang ballistic missile ang isla nga sang ulihi, nahisayran nga isa ka false alarm.
Sa exclusive interview sang Bombo Radyo Bacolod kay Pia Mae Tumbagon, tumandok sang Bingawan, Iloilo apang nagaistar na sa karon sa Waipahu, O’ahu, Hawaii, nakabugtaw ini nga nagapanic ang mga pumuluyo sa palibot matapos nga nakabaton sang emergency alert sa ila cell phones.
Gilayon nga nagpamakal sang groceries ang mga residente kag nagkadto sa evacuation centers, santo sa abiso nga magpangita gilayon sang shelter.
Nakit-an man sini nga nagadinalagan ang mga pumuluyo bangud sa kakulba.
Bisan sanday Tumbagon ang nagkadto man sa grocery stores agud nga magbakal sang kinahanglanon.
Makaligad ang 30 minutos, isa naman ka mensahe ang ginpadala sang emergency alert system nga false alarm ang una nila nga nabaton kag wala sang pamahog sang missile attack sa estado.
Naligaran pa sang isa ka oras antes nagbalik sa normal ang sitwasyon sa Hawaii bangud sa kahadlok nga ginbatyag sang mga tawo.
Suno kay Tumbagon, ginapatihan sang mga residente ang emergency alert kag ini ang labing una nga kahigayunan nga nakaangkon sang false alarm matapos nga natum-ok sang isa ka staff sa Hawaii Emergency Management Agency ang sala nga button.
Disappointed ang mga pumuluyo suno sa iya bangud tion kuntani ini agud mag-relax kadungan sang weekend rason nga ila ginabasol ang staff sang HEMA nga nakakomiter sang sala.
Gindula man sini ang kahangawa sang iya pamilya sa Iloilo bangud hilway sila sa estado sang Hawaii.
Ang missile threat ang ila nabaton kaina sang kaagahon, oras sa Pilipinas.
