BACOLOD CITY — 15, 000 ka bag-o nga mga miyembro ang ginapangita sang Philippine National Police Special Action Force subong nga tuig 2018.
Suno kay Police Inspector Mickglo Mariñas, chief for administration sang 62nd Special Action Company sang SAF sa Manapla, padayon sa karon ang pagbaton sang application sang luyag magsulod sa elite force sang PNP.
Apang gin-athag sini nga lunsay mga lalaki lamang ang ginapangita sa karon.
Sarang nga maka-apply ang mga naga-edad sang 21 tubtub 30 anyos; Filipino citizen; may good moral character; physically fit kag may yara sang civil service eligibility ukon nakapasar sa board examination.
Sa karon, wala na sang height requirement sa mga luyag magsulod sa PNP-SAF.
Suno kay Mariñas, ang sin-o man nga luyag mag-apply ang sarang nga makakuha sang application form sa 6th Special Action Battalion kag igapasa ini sa Police Regional Office 6 sa Camp Martin Delgado sa ciudad sang Iloilo.
Sa tion sang submission suno kay Mariñas, dapat nga magasuksok ang applicant sang puti nga V-neck T-shirt; maog nga pantalon kag puti nga sapatos.
Nahibaluan nga nagsaka na sa karon ang sweldo sang mga miyembro sang PNP.
