Gina-alegar nga gintaban ang isa ka 17 days old nga lapsag nga lalaki sang nagpakilala nga paryente sang iya iloy sa ciudad sang Bacolod kaina sang hapon.
Sa interview sang Bombo Radyo Bacolod kay P/ Major Jovil Sedel, hepe sang Police Station 1, nagpa-check up sa Corazon Locsin Montelibano Memorial Regional Hospital ang mag-iloy nga ginkilala kanday Mary Grace Goto, 24-anyos kag ang lapsag nga si Baby William nga taga-Hacienda Teresita, Barangay Granada.
Pagkatapos sini, may yara sang isa ka babayi nga nagasunod-sunod sa ila kag nagpakilala nga ila paryente.
Gindala ang mag-iloy sa isa ka mall sa reclamation area kag naglagaw-lagaw.
Gintanyagan man si Mary Grace sang wala pa nakilal-an nga suspetsado nga magpa-rebond.
Nagpasugot man ini kag nagpadulong sila sa isa ka salon sa dalan Luzuriaga-San Juan.
Suno sa iloy, ang babayi ang nagbitbit sang bata sa guwa sang salon samtang yara siya sa sulod.
Pagkadugay-dugay, naglisensya ang suspetsado nga mabakal siya sang pagkaon upod ang lapsag.
Apang, wala na ini nakabalik pagkaligad sang isa ka oras.
Upod ang empleyado sang salon, nagpadulong ang iloy sa Police Station 1 agud magpangayo sang bulig.
Samtang, nagapanawagan naman ang amay sang lapsag nga si Wilmer Goto sa suspetsado nga ibalik na ang ila nga bata.
Suno diri, wala siya sang may nahibaluan nga motibo kun ngaa ginkuha ang ila nga bata.
Sa karon, nakakuha na sang CCTV footage gikan sa mall ang kapulisan kun sa diin makit-an ang suspetsado nga nagasuksok sang itom nga t-shirt, itom nga shorts kag itom nga sapatos.
