Arestado ang tatlo ka persona matapos makuhaan sang masobra P1.5 million nga balor sang suspected shabu sa drug buybust operation nga ginpatigayon sa Prk Lampirong, Brgy 2, Bacolod City alas-11:22 kagab-i.
Ang mga nadakpan ang ginalakipan sang subject person nga si Alyas Robert, 28 anyos, wala sang trabaho, residente sa Prk Roadside, Brgy Alijis, Bacolod City; kasubong man sanday Alyas Jorimel, 20 anyos, kag Alyas Lance, 22 anyos, lunsay single kag wala sang trabaho, nga residente sa Brgy 6, San Carlos City.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 2, narecover sa tatlo ka suspect ang tatlo ka knot tied kag anom ka plastic sachet sang suspected shabu kalakip na ang buybust item.
Pahayag sini nga si Robert ang may record na nga nadakpan sadto bangod man sa illegal nga droga.
Suno kay Tapang, ang supply ang naggikan sa gwa sang Negros Island, kag ginapasulod sa isla paagi sa mga entry points sa kadagatan.
Aminado si Tapang nga nagadamo gid man ang ginapasulod nga supply sa mga selebrasyon kaangay sang Masskara Festival 2026.
Ginahulat nalang nila nga maggwa ang resulta sa crime laboratory agud mapasaka na ang kaso.
Pasalig sini nga padayun ang operasyon sang kapulisan, kag ginpasanyog pa ang police visibility, crime prevention, kag anti-illegal drugs operations subong nga Masskara Festival.
