Nagakasubo ang Bantay Bigas sa pagpanguna sang Pilipinas sa mga pungsod nga may pinakamadamo nga gin-import nga bugas sa bilog nga kalibutan.
Nahibaluan nga nagalab-ot sa three million metric tons (MT) ang rice imports sang Pilipinas sini nga tuig kag nalapawan sini ang China nga may yara lang sang 2.5 MT nga nabakal sa global market gani ini na ang world’s biggest rice importer sa 2019.
Sa tatlo ka tuig, nagsaka sa apat ka pilo ang rice imports sang pungsod humalin 800,000 MT.
Sa interview sang Bombo Radyo Bacolod kay Cathy Estavillo, Spokesperson sang Bantay Bigas, ginpahayag sini nga nagakasubo sila nga nagapanguna ang Pilipinas sa rice imports bangud madamo sang mga mangunguma ang maapektuhan kag madulaan sang gana nga magtanom.
Suno kay Estavillo, makahuluya kag isa ini ka tampa sa gobyerno bangud epekto ini sang ginpatuman nga Rice Tariffication Law.
Bangud sini, nagapanawagan ang grupo nga ibasura ang nasambit nga layi bangud halit ini sa industriya sang humay.
Gindugang niya man nga indi ang pag-import sang bugas ang kinahanglan sang pungsod kundi ang direct support subsidies sang gobyerno para sa mga local farmers.
Suno sa spokesperson, walo na ka tuig nga nagataas ang production cost sang mga mangunguma samtang naganubo naman ang presyo sang ila nga mga produkto.
Gani nagahingyo ini sa gobyerno nga tutukan ang mga kinahanglanon sang mga mangunguma kag ang pagpanubo sang production cost.
Gindugang man ni Estavillo nga may yara na sila sang masobra 50,000 ka mga signatures nga nakolekta kag magapadulong siya sa kongreso agud ipalab-ot ang ila nga apila nga mabasura ang Rice Tarrification Law.
