Madamo sang mga reklamo nga nabaton ang Bacolod City Police Office (BCPO) kahapon kadungan sa pagbukas liwat sang pila ka mga negosyo kag trabaho matapos gindowngrade sa general community quarantine ang status sang ciudad.
Sa interview sang Bombo Radyo Bacolod kay Police Lt. Col. Ariel Pico, spokesperson sang BCPO, ginpahayag sini nga humalin sang nagsugod ang GCQ sa ciudad sang nagligad nga Sabado, madamo na sang mga salakyan nga nagasulod sa Bacolod.
Na-obserbahan man sini nga mas nag-gutok ang trapiko kahapon bangud nga nagbinalik ang mga tawo sa ciudad kadungan sang pagbalik liwat sang pila ka mga trabaho.
Bangud diri, nagpatawag man kahapon sang meeting si BCPO director Col. Henry Biñas agud nga tungaon liwat ang Bacolod City Mobile Force Company nga magabantay sa mga nagadinagsa nga mga tawo.
Naga-apelar naman si Pico sa mga establisyemento kag mga malls nga ipatuman sang husto ang healthy protocols ilabi na ang social distancing.
Nagpangabay man ini sa mga driver sang public utility jeepneys (PUJs) nga magbutang sang plastic barriers antes magbiyahe.
Nagapanawagan naman ini sa tanan nga may yara sang makit-an nga pagginutok ukon pagdinagsa sang mga tawo nga gilayon magpakig-angot sa BCPO agud nga marespondehan dayon.
