Pila ka mga butang ang gindiskusyunan sa pagsinapol kahapon sang committee on transportation sang Sangguniang Panlungsod sang Bacolod upod ang Land Transportation Office (LTO), Bacolod Traffic Authority Office (BTAO) kag Land Transportation Franchising and Regulatory Board (LTFRB) subong man ang mga transport sector sa ciudad.
Sa interview sang Bombo Radyo Bacolod kay Councilor Dindo Ramos, chairman sang committee on transportation sa SP, ginpahayag sini nga madamo sang mga concerns ang ginpalab-ot sang transport sector sa amo nga meeting.
Isa sa mga ginakahangaw-an sang mga jeepney drivers amo nga basi dakpon sila sang LTO bangud wala pa sila sang special permit nga isa sa gina-require sang LTFRB.
Suno kay Ramos, gintawgan sini si LTFRB -6 regional director Richard Osmeña kag ginpahayag sini nga mahimo ang mga PUJ drivers mag-apply sang special permit paagi sa online kun sa diin insurance kag OR-CR lamang ang mga requirements.
Nagpasalig man si Osmeña nga gilayon nila nga iapprove ang application kag ihatag ang special permit lakip na ang adjusted fare matrix.
Nahibaluan nga nagsaka na ang pletehan sa P9 para sa una nga apat ka kilometros samtang dugang naman nga P1.50 sa kada dugang nga kilometro.
Gin-athag naman ni Ramos nga basta wala pa sang bag-o nga fare matrix ang mga jeepney drivers, indi pa sila pwede makapanukot sang fare increase.
Samtang, mapasar man si Ramos sang resolusyon sa SP subong nga adlaw angot sa pagpahanugot sa duha ka pasahero nga makasakay sa tricycle apang dapat icomply lang ang health protocol kag mabutang gid sang plastic barrier.
Kasunod ini sang pag-ayo sang pila ka mga tricycle operators kag drivers bangud suno sa mga ini, nagapamierdihan sila kun isa lang ang pasahero nga mahimo isakay sa kada pagbiyahe.
Nahibaluan nga nakasaad sa guidelines sang national IATF nga isa lang ka pasahero ang pwede makasakay sa tricycle agud malikawan nga maglapta ang virus.
Samtang, maga-file man sang resolusyon si Ramos nga naga-apelar sang compassion kag generosity nagikan sa mga operators nga panubuan ang renta sang mga PUJs.
Magluwas diri, magapasar man ini sang resolusyon nga nagapahanugot sa pag-angkasanay sang mag-asawa ukon family member sa motorsiklo.
Suno kay Ramos, nagahuliday man ang mag-asawa sa ila mga puluy-an kag ang ila mga bata ang kaupod man nila sa adlaw-adlaw nga tanan, gani wala sang rason agud indi ini pagpahanugutan.
