Makaligad ang apat ka tuig humalin sang ini ang namissing, nasapwan na kahapon ang isa ka lalaki nga tumandok sang Purok Kamonsilan, Brgy. Busay, Bago City.
Sa interview sang Bombo Radyo kay Rosalie Dionisio, magulang sang biktima nga si Joey Jalandoon, Marso 24, 2016 pa sang ulihi sini nakita ang utod.
Suno diri, ulihi sini nakita ang 39-anyos nga biktima sang nagdul-ong ini sang tinapay kag softdrinks.
Ginpahayag ni Dionisio nga palalagaw ang utod gani ginpaminsar na lamang sini nga nagapauli man ini sa kaugalingon nga balay sa Purok Kamonsilan, Barangay Busay, Bago City.
Gindumdom naman sang mga ini nga nagpadulong sa luwas sang pungsod ang biktima gani wala ini nakakontak sa ila sulod sang apat ka tuig.
Wala gid ini naglaom nga patay na ang utod sini tubtob nga may nagpahibalo sa mga ini nga kutkuton ang bubon kag didto nakita ang pila ka mga tul-an sang lawas sang biktima.
Natumod man sini ang biktima paagi sa panapton sini nga santo man nga ginsuksok sang biktima sa postal ID sini.
Antes pa sini, ginpadamgo pa ang mga ini sang biktima nga luyag ini nga magpauli.
Wala naman ini sang ideya kun ano ang natabo sa utod sini antes pa nakutkutan sa bubon.
Dugang pa sini, napablotter niya naman sang Enero pa apang wala sini ginhinambit kun ano nga tuig.
Santo sa inisyal nga imbestigasyon sang Bago City Police Station, base sa testimoniya sang witness, nagapakita nga antes pa ang insidente nagainum-inum ini sa balay ni Susana Jalando-on mga alas otso ang takna sang gab-i sadtong Abril 15, 2016 tubtob ala-una sang kaagahon sang Abril 16, 2016.
Mga psasado ala-una sang kaagahon ginhagad siya ni Jay-r Tipawan agud magpauli apang nakalabay ang mga ini sa irigasyon kag nagdulog sang makadali.
Pila ka minutos ang nakaligad, naglabay ang biktima nga si Joey Jalando-on kaupod si Stephen Tolosa kag wala sang madamo nga argyumento, ginbuno ni Jay-r Tipawan ang biktima nga nag-igo sa liog samtang ginlampusan naman ini sang martilyo ni Stephen Tolosa.
Matapos ang insidente, gindala sang mga ini ang biktima sa uma ni anay Federico Tolosa sa nasambit nga lugar kag ginlubong sa bubon.
Ginpaidalom naman sa medical examination ang narecover nga tul-an agud mahibaluan kun babayi ukon lalaki.
