Ginaimbestigaran sang Schools Division Superitendent sang Department of Education (Dep-Ed) Division of Bacolod City ang mga eskwelahan sa ciudad nga wala pa nakabakal sang bond paper para sa modules sang mga estudyante bisan may yara man sang budget para sa maintenance and other operating expenses (MOOE).
Sa interview sang Bombo Radyo Bacolod kay Gladys Amylaine Sales, ginpanindugan sini nga may yara sang budget nga ginhatag ang Department of Education sa mga principal nga inugbakal sang bondpaper agud gamiton sa reproduction sang modules bilang preparasyon sa pagbukas sang klase subong nga Agosto 24.
Suno diri, bulan pa lang sang Hunyo, ginhambalan na sini ang mga principal sang mga eskwelahan nga gamiton na ang Maintenance and Other Operating Expenses (MOOE) sa pagbakal sang bondpaper agud gamiton sa reproduction sang modules apang paimbestigaran sini ang report nga nabaton nga may isa ka principal nga wala pa nakapanghatag sang bondpaper sa mga manunudlo gani nagsolicit lamang sila sang mga bondpaper agud makaumpisa sang reproduction sang module.
Hatagan naman sini sang benefit of the doubt ang natungdan kag monitoron man sini agud mahibaluan kun nagakinahanglan ini sang bulig.
Suno kay Sales, may yara gid man nga mga stakeholders nga boluntaryo nga nagahatag sang donasyon apisar nga wala ginapanguyuan.
Samtang, madugay naman nga ginapractice ang brigada eskwela kun sa diin ginapatigayon paagi sa pormal nga seremonya kag ginalista man sang naassign sa Brigada ang tanan nga mga pormal nga donasyon agud maathag nga wala sila nagsolicit.
Ginpahayag man sini nga may yara sang ginhatag nga lecture ang central office nga modules angot sa Covid-19.
Dugang man sini nga sarang magdangat sa P50 million ang kabug-usan nga gastuson sa pagreproduce sang modules.
