Nagpatigayon sang simulation exercises ang mga kapulisan sa mga eskwelahan sa bug-os nga Negros Island Region.
Sa interview sang Bombo Radyo Bacolod kay Police Lt Col Joem Malong, spokesperson sang Police Regional Office-Negros Island Region, nagapatigayon sang SIMEX para matudluan ang mga kabataan kun ano ang himuon kun may yara sang active shooter, stabbing incident kag ano man nga insidente.
Suno kay Malong, kinahanglan sang Philippine National Police nga magpatigayon sang nasambit nga aktibidad bangud indi kaangay sang linog kag nakahibalo na ang mga estudyante kun ano ang himuon bangud sa ginapatigayon nga fire kag earthquake drills.
Suno diri, ang mga ginatudlo sa simulation exercises ang mahimo nga madala sang mga bata tubtob nga magdako ang mga ini.
Nagapadayon ang mga eskwelahan sa ginapatigayon nga simulation exercises nga ginapangunahan sang mga kapulisan kag gina-schedule lamang ang mga eskwelahan kun sa diin ini patigayunon.
Pahanumdom sang mga kapulisan nga kun may mga insidente sa mga eskwelahan, likawan gid nga magkuha sang video unahon gid ang safety kag magtawag sa emergency hotline 911 kag makapangayo gilayon sang bulig kag marespondehan man gilayon.
