Igapaidalum na sa Alert Level 2 ang syudad sang Bacolod kag probinsya sang Negros Occidental sumugod bwas Pebrero 16 tubtob 28, 2022.
Gin-anunsyar sang Malacanang kahapon nga magapabilin ang Metro Manila sa Alert Level 2 tubtob sa Pebrero 28, 2022.
Ginpagwa ni acting presidential spokesperson Karlo Nograles ang anunsyo matapos nga mahisugtan sang Metro Manila Council nga ginabug-usan sang 17 ka mga alkalde sa Metro Manila ang pagpabor nga magpabilin sa Alert Level 2 ang rehiyon tubtob sa katapusan sang Pebrero.
Samtang ang ginpaidalum naman sa Alert Level 3 suno kay Nograles ang ginalakipan sang Iloilo City, Iloilo province, Guimara, Zamboanga City, Davao de Oro, Davao Occidental kag South Cotabato.
Sa Alert Level 3, ang pila ka mga establishimento ang pahanugutan nga mag-operar sa 30 porsyento sang indoor venue capacity basta fully vaccinated ang empleyado.
Kalakip naman ang in-person classes, contact sports, fun fairs perya kag casino sa mga aktibidad kag establishimento nga wala ginpahanugutan sa Alert Level 3.
Ang iban pa nga mga lugar nga ginbutang sa Alert Level 2 humalin sa Pebrero 16 tubtob 28 ang ginalakipan sang Aklan, Antique, Bacolod City, Capiz at Negros Occidental sa Region VI; Cebu City, Lapu-Lapu City, Mandaue City, Bohol, Cebu, Negros Oriental and Siquijor in Region VII; kag Ormoc City, Tacloban City, Eastern Samar, Leyte, Northern Samar, Western Samar, Biliran at Southern Leyte sa Region VIII kag iban pa nga bahin sang Luzon kag Mindanao.
Ginalauman naman sang chairman sang local inter-agency task force sang Bacolod nga ipaidalom sa Alert Level 2 ang alert level system sang Bacolod City kag Negros Occidental halin sa Alert Level 3.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga bangud sa bag o nga alert level sang syudad may yara naman sang pagbag-o sa mga restrictions kaangay sang pagbalik sa 50 percent nga occupancy sa restaurants kag amat-amat na nga liwat nga paghalog sa mga restrictions.
Ginalantaw man sang bise alkalde nga mahimo sa bulan sang Marso mabalik na ang face to face classes sa syudad sang Bacolod.
Ginpahayag man sini nga naga-amat amat naman balik ang ekonomiya sa syudad sang Bacolod.
Suno diri para sa iya iparehason lang kuntani ang mga travel requirements ilabi na kun pareho na ang alert level kaangay sang indi na pagrequire sang negative rt pcr test result.
Nagpanugyan man ini nga padayon ang pagsunod sang minimum health protocols batok sa COVID-19.
