Arestado ang Barangay Kagawad sang Bgry. Alijis kag ang kaupod sini sa buybust operation nga ginpatigayon sang Bacolod City Police Office-City Drug Enforcement Unit (BCPO-CDEU) sa Alijis Taculing Road, Brgy. Alijis, Bacolod City kaina sang kaagahon.
Ginkilala ang mga arestado nga sanday Barangay Kagawad Abby Araneta, 28 anyos, single kag residente sang ECC Villas Subd., Brgy Alijis, Bacolod City kag Freely Boy Aldas, 39 anyos, kasado kag residente sang Prk.Cabugwason, Brgy Mansilingan, Bacolod City.
Sa interview sang Bombo Radyo Bacolod kay Police Lt. Joven Mogato, pinuno sang CDEU, ang subject sang buybust operation amo si Araneta, siya ang anay SK Kagawad antes nangin kagawad sang Barangay.
Suno kay Mogato si Araneta kag Aldas ang newly identified drug personality apang makabig na sa karun nga high value individual.
Wala man ini sang record sa barangay kag indi pa mapahayag sa publiko kun sa diin ang mga ini nagakuha sang supply sang illegal drugs bangud nagapadayon pa ang ila nga imbestigasyon.
Suno kay Mogato antes pa man madakpan sanday Araneta kag Aldas may yara na sila sang ginpatigayon nga transaction.
May namonitor man ang CDEU nga ginameet-up lamang ni Araneta ang illegal nga druga kag may yara sang runner ukon kabayo nga nagadistribute sa syudad sang Bacolod.
Nakuha sa ila paghinakop ang suspected shabu nga may kabug-aton 201 grams.
Antes pa sang Masskara Festival ginamonitor na sang CDEU ang subject sa buybust operation.
Nakahunong na ang mga ini sa Bacolod Police Station 7 kag natalana nga mapasakaan sang kaso subong ukon bwas nga adlaw sa paglapas sa RA 9165 ukon Comprehensive Dangerous Drugs Act of 2002.
