Patay ang ginpahayag katapo sang New People’s Army sa nagluntad nga engkwentro sa Crossing Lansang, Barangay Talaon, La Libertad, Negros Oriental sang Lunes, Pebrero 10 sang gab-i.
Sa interview sang Bombo Radyo Bacolod kay Lieutenant Colonel Evelio Ilanga III, commander sang 62nd Infantry Battalion (62IB), Philippine Army, sang Lunes sang gab-i nag-umpisa sila sa pagpatigayon sang pursuit operation sa mga gina-alegar katapo sang makawala nga grupo nga mahimo responsable sa pagpanunog sang mga heavy equipments sa Barangay Aya, La Libertad, Negros Oriental sang Sabado.
Suno kay Ilangga, samtang nagapatrolya ang tropa sang 62nd Infantry Battalion (62IB), Philippine Army, ginpalupkan ang mga ini sang kapin apat ka mga persona nga nagresulta sa engkwentro.
Matapos ang pila ka minutos nga engkwentro, nakita sang mga ini nga may isa ka ginbilin nga napatay nga may yara sang M14 rifle.
Ang napatay ang ginkilala kay Rolito Tanillo alias “Roy/Gamatoy,” miyembro sang Sangay Yunit Pampropaganda (SYP) Squad, CN1 (D), KR-NCBS, kag residente sang Barangay Talaon, La Libertad.
Suno kay Ilangga siya ang natumod paagi sa informant sang tropa sang gobyerno kag anay mga rebelde.
Ang ginluntaran sang engkwentro kag pagsunog sang heavy equipments ang napunta na nga bahin sang La Libertad.
Ang tag-iya sang mga heavy equipments ang naglibog man ang ulo sang rason sa pagsunog bangud wala ang mga ini sang nabaton nga sulat gikan sa gina-alegar NPA.
Nagapanawagan si Ilangga sa mga nabilin pa nga makawala nga grupo nga magbalik na sa sabak sang gobyerno kag mag-avail sang Enhanced Comprehensive Local Integration Program (E-CLIP) agud nga makaangkon sang matawhay kag malinong nga pagpangabuhi.
