Ginakondenar sang Police Regional Office – Negros Island Region (PRO-NIR) ang pagpalapta sang fake news angot sa engkwentro nga nagluntad sa tunga sang 2nd Maneuver Company sang Regional Mobile Force Battalion – Negros Island Region kag rebelde nga New People’s Army sa Sitio Kabalagnan, Brgy Lalong, Calatrava, Negros Occidental sang Hunyo 14.
Sa interview sang Bombo Radyo Bacolod kay PRO-NIR Spokesperson Police Lt Col Joem Malong, una na sila nga gin-anunsyar na nga wala sang casualty ukon injured sa natabo nga engkwentro apang may yara sang nagpost sa facebook nga nagpahayag nga may yara sang napatay kag ini nagtuga sang kakulba sa mga pamilya sang mga namensyonar nga napatay sa engkwentro.
Suno kay Malong, sala ang impormasyon bangod buhi ang mga ini kag padayon nga nagaduty.
Sa karun gina-imbestigaran na kun sin-o ang nagapanag-iya sang account kag ano ang intensyon sini sa pagpalapta sang fake news.
Paandam sini nga mangin responsable sa paggamit sang social media kag maghalong sa pagpalapta sang impormasyon.
