Anay Barangay Kagawad, patay matapos ginpaarakan sang luthang sa banwa sang Calatrava

Patay ang anay Barangay Kagawad matapos ginpaarakan sang luthang sa Barangay Dolis, Calatrava, sang Pebrero 26, alas-6:00 sang gab-i.

Ang biktima ang ginkilala nga si alyas Jomarie, 51 anyos, nagatrabaho bilang mangunguma, kag residente sang nasambit nga lugar.

Sa interview sang Bombo Radyo Bacolod kay Police Major Wilfredo Benoman Jr., hepe sang Calatrava Municipal Police Station, masakay na kuntani sa motorsiklo si alyas Jomarie kaupod ang iya utod kag isa ka helper sang may nag-abot nga duha ka persona.

Hinali lang gintiro sang suspek ang biktima nga nag-agom sang pilas sa ulo, likod kag natuo nga kamot.

Sa karun padayon pa ang imbestigasyon sa motibo kag identity sang mga suspek.