Yara na sa maayo nga kahimtangan ang tiyo nga ginbuno sang hinablos sa Prk Kawayanan 2 Phase 6B Brgy Handumanan, Bacolod City, Negros Occidental sang Lunes Marso 31, sang gab-i.
Ginkilala ang biktima kay Ringgo Buenaflor, 52 anyos, single, mekaniko residente sang Purok Mabinulugon 2, Barangay Handumanan samtang ang suspect ang ginkilala kay Domingo Tiopes, 32 anyos, manugbaligya utan kag residente man sang nasambit nga lugar.
Sa interview sang Bombo Radyo Bacolod kay Police Captain Glen Montaño, station commander sang Bacolod Police Station 10, may yara sang nagluntad nga stabbing incident sa nasambit nga lugar kun sa diin ginrespondehan man gilayon sang mga kapulisan.
Suno kay Montaño, may yara sang ginbaisan ang duha nga nagresulta sa pagbuno sang suspek sa biktima.
Wala man nakainum ang duha apang masami ang mga ini nagalalisay kag nagalahugay.
Gindala sa ospital ang biktima nga maayo na ang kahimtangan samtang ang suspek ang nakapalagyo kag tubtob sa karun at-large sa gihapon.
