Ginalantaw na ang CCTV footage sa balay kun sa diin nasapwan nga patay kag duguon ang 82 anyos nga lalaki sa Prk NEDF, Brgy Handumanan, Bacolod City, kasubong man ang mga CCTV footages sa palibot.
Ang biktima ang ginkilala nga si Seigfredo Magalona, 82 anyos.
Sa interview sang Bombo Radyo Bacolod kay Police Captain Lelanie Lagoting, station commander sang Bacolod Police Station 10, ginahulat pa nila ang assessment sang Scene of the Crime Operation (SOCO) sa biktima, agud matumod kun ano ang rasun sa kamatayon sini.
Napahibalo man sa ila nga may natabo na nga pagpanalod kag pagpangawat sa ginakay-o nga balay, kag sang Agosto, nacapture sang CCTV camera ang nagapangsulod, apang indi makilal-an bangod mata lamang ang makita.
Sa karun, gina-usisa na sang bata sang biktima nga yara sa Dubai ang CCTV footage.
Luwas diri, may mga CCTV camera man sa mga kaingod nga balay kag repair shop nga ginpadal-an naman nila sang request.
Nagalaom si Lagoting nga sila ang may makuha nga footage nga makatumod sa suspect nga nagsulod sa balay kag nagpatay sa tigulang.
Pahayag sini nga may mga persons of interest naman ang mga tawo sa palibot nga ila man tutukan sa imbestigasyon.
Pasalig ni Lagoting nga indi sila maga-untat tubtob indi masobar ang kaso.
