Ginsaka sang mga personnel sang water district sa La Carlota City ang mga spring agud matumod kun ano ang rasun sa pagkadula sang water supply.
Madumduman nga kadungan sa pag-ulan sang abo gikan sa minor explosive eruption sang Bulkan Kanlaon kahapon, na-utod man ang water supply.
Sa interview sang Bombo Radyo Bacolod kay La Carlota City Mayor Rex Jalando-on, ginalantaw nila nga nagsupon ang mga ashfall sa duha ka spring sang ciudad, rasun nga wala na sang may nagapanaog nga tubig.
Nahibaluan nga nagdangat sa isa ka pulgada ang kadamulon sang abo sa mga dalanon.
Suno kay Jalando-on, mabudlay ang pagsaka sa spring bangod magluwas nga masiot ang area bangod wala na sang pumuluyo, napuno pa sang abo ang mga kahoy.
Ginapasalamatan naman sang alkalde ang mga banwa kag ciudad kalakip na ang Provincial Government sang Negros Occidental nga nag-augment sang fire trucks kag water filtration sa mga residente nga apektado sang abo.
Suno kay Jalando-on, apat tubtob lima lamang ka pamilya ang nadugang sa ila mga evacuees, nga gikan sa Barangay Ara-al kag Barangay San Miguel.
Pahayag sini nga ang La Carlota City ang may kaugalingon nga water filtration truck apang sa kadamuon sang sitio indi nila matatapan tanan.
Ang Provincial Government ang nagpadala man sang water filtration truck kahapon samtang may pila ka mga banwa kag ciudad kaangay sang Bago City, Victorias City, Cadiz City kag Murcia ang nagpadala naman sang firetrucks.
Ang tubig gikan sa firetrucks ang para sa galawion sang mga pumuluyo kag may ginagamit man para sa flushing sang mga abo sa dalan.
