15 kg ukon balor P18 million nga high grade marijuana, narecover sa isa ka lalaki sa Brgy Tangub, Bacolod City
-- ADVERTISEMENT --

P18 million nga balor ukon 15 kilograms sang high grade marijuana kush ang narecover sa isa ka lalaki sa Gardenville Subdivision, Brgy Tangub, Bacolod City subong nga adlaw.

Sa interview sang Bombo Radyo Bacolod kay Bacolod City Drug Enforcement Unit Head Police Lt Col Roberto Indiape, lima ka bulan nila nga ginmonitor ang suspect tubtob nga nakapatigayon sang transaksyon kag drug buybust operation.

Pila ka pinutos sang high grade marijuana ang narecover nga daw kaangay sang parcel sang produkto ang packaging ang narecover, nga ginabanta 500 grams ang bug-at sang kada putos.
Sa impormasyon, gina-alegar nga gikan sa Thailand ang illegal nga marijuana kag ginbagsak sa Manila, samtang gikan sa Manila ini ang ginpalapta sa nagkalainlain nga bahin sang pungsod.
Ginalantaw man ang posibilidad nga ini ang ginkarga upod sa mga regular nga parcel.

Suno kay Indiape, iban sa mga pinutos ang may pangalan na, nga nagakahulugan nga may-ara na sang naka-order, samtang ang wala sang pangalan ang mahimo pa nga irepack sa mas magagmay nga pinutos.

May posibilidad man nga may mga kaupod pa ang nadakpan sa illegal nga transaksyon.
Ginalantaw man nga sa social media na ginapatigayon ang transaksyon, kag pagbayad, samtang ginapadeliver na lamang sa buyer ang high grade marijuana kush paagi sa delivery services nga kaangay sang regular parcel.

-- ADVERTISEMENT --