Ginpahayag sang Pinoy sa Rome, Italy nga wala pa sang prospect kun sin-o ang masunod nga Santo Papa sang Simbahang Katolika matapos nga magtaliwan si Pope Francis sang Easter Monday.
Sa interview sang Bombo Radyo Bacolod kay Jeff Vinas Lagos, Bombo News International Correspondent sa Rome, Italy, wala pa sang prospect apang sa 138 ka mga Cardinal may yara na sang 22 nga pagapilian.
Suno kay Lagos, nalakip sa 22 amo si Cardinal Luis Antonio Tagle sang Pilipinas.
Suno diri, may posibilidad nga mapilian bilang madason nga Santo Papa si Cardinal Tagle.
Ginpahayag man sini nga importante para mapilian agud mangin madason nga Santo Papa amo nga malakip sa 22 ka pagapilian.
Sa pagpili sang madason nga Santo Papa pagapilion man sa 138 ka mga cardinals ang may mabakod nga mga academic degree kag isa pa sa factor ang malapit sa Santo Papa kun sa diin isa na si Cardinal Tagle.
Samtang makita man sini sa ordinaryo nga adlaw si Cardinal Tagle bangud sa balay ini sang mga pari sa Roma nagapuyo.
Suno kay Lagos dako ang pagsalig ni Pope Francis kay Cardinal Tagle bangud ginhatagan niya pa ini sang position sa Vatican.
Ang tion kun sa diin nagtaliwan ang Santo Papa tubtob sa eleksyon ang ginatawag nga “sede vacante” ukon the vacant seat.
Magapadulong sa Rome ang mga cardinal sa bug-os nga kalibutan para sa lubong sang Santo Papa kag conclave para sa eleksyon sang bag-o nga Santo Papa.
Sa pagpili sang madason nga Santo ang patigayunon sa isa ka conclave sa sistine chapel.
Ang mga cardinals ang magaboto close door sa nasambit nga chapel kag indi ang mga ini makagwa tubtob nga wala sang may mapilian nga Santo Papa.
Ang pagpili sa madason nga Santo Papa ang secret ballot kun sa diin ginasunog ini kun itom ang magwa nga aso sa chapel wala pa sang may napilian apang kun may yara na puti naman ang aso nga magwa sa chapel.
