Wala na nag-evacuate ang mga residente kun sa diin nagluntad ang engkwentro sa tunga sang miyembro sang New People’s Army kag mga militar sa Sitio Candiacap, Brgy. Tapi syudad sang Kabankalan, Negros Occidental, kahapon, Abril 27.
Ang engkwentro ang nagluntad sa tunga sang New People’s Army kag mga tropa sang 11th, 15th kag 47th Infantry Battalion sang Philippine Army.
Sa interview sang Bombo Radyo Bacolod kay Kabankalan City Mayor Benjie Miranda, ang mga residente ang wala na ginpwersa nga mag-evacuate bangud ang mga ini na ang nagpahayag nga kumportable man ang mga ini kag ginaulikdan sang mga ini ang ila nga mga kasapatan.
Suno kay Miranda, wala man sang order nagikan sa militar nga kinahanglan sang mga ini nga mag-evacuate.
Gin-abisuhan nalang sang alkalde ang mga pumuluyo nga kun ingkaso nga luyag nila nga mag-evacuate nakahanda naman ang ciudad sa pagkuha sang mga ini bangud yara naman ang salakyan sang Disaster Risk Reduction Management Office nga nakastandby sa lugar.
Indi man mahambal sang alkalde kun infested sang mga rebelde ang nasambit nga lugar.
Indi man makumpirmar ni Miranda ang ginapahayag nga nasalabat sa engkwentro bangud ang nabaton sini nga impormasyon ang gindala na sa ospital apang wala man ini nakakita.
Personal man nga ginpadulungan sang alkalde ang lugar agud nga tsekyaron ang sitwasyon sang mga residente kasunod sang engkwentro.
