Masobra apat sa lima ka mga cardinals nga nagaboto para sa mangin masunod nga Santo Papa ang gin-ordain mismo ni Pope Francis.
Sa 133 ka mga miyembro sang College of Cardinals nga naga-edad manubo sa 80-anyos nga eligible sa pagboto sa conclave, 108 diri ang gin-install ni Pope Francis.
Suno kay Susan Timoney, isa ka professor sa Catholic University of America sa Washington, DC, ang conclave sa karun ang isa sa pinaka-diverse nga ila nakaangkon sa maragtas sang Simbahan.
Sa 12 ka tuig nga pagka-Santo Papa ni Francis, naka-appoint ini sang masobra 20 ka mga cardinals nagikan sa mga pungsod nga wala pa sang may na-appoint nga cardinal, kalabanan nagikan sa developing countries lakip na ang Mongolia, Laos, Papua New Guinea kag Mali.
Bangud madamo sang mga cardinals nga gin-appoint sang nagliligad nga mga Santo Papa ang naglapaw na sa edad nga 80, ang generation shift sa edad sang mga cardinals ang nagpahanugot sa iya nga mag-appoint sang bag-o nga mga miyembro nagikan sa nagkalain-lain nga bahin sang kalibutan.
