Ginpahanumdom sang Commission on Election – Negros Island Region sa mga nagkandidato sa 2025 National and Local Elections nga i-file na ang ila nga Statement of Contributions and Expenditures (SOCE).
Sa interview sang Bombo Radyo Bacolod kay COMELEC-NIR Assistant Regional Director Atty Jossil Macute, tanan nga nakigbahin sa eleksyon, nagdaog, napierde ukon ang mga nagwithdraw ang kinahanglan nga magfile sang SOCE tubtob lamang sa Hunyo 11.
Ang mga kandidato ang magafile sang SOCE sa opisina kun sa diin nila ginfile ang Certificate of Candidacy (COC).
Sa layi, ang filing sang SOCE ang dapat mahimo sa sulod sang 30 ka adlaw matapos sang eleksyon.
Dugang pa ni Macute nga indi maka-assume sa pwesto ng mga nagdaog sa eleksyon kun wala sang SOCE bangod ini ang isa sa requirements sang Department of the Interior and Local Government (DILG).
May-ara sang SOCE form nga sarang madownload sa Comelec website.
6 Diri ibutang tanan nga gingasto may kaangtanan sa pagpangampanya, kalakip na ang gatong sa salakyan kag mga advertisement.
Ini ang indi man dapat dayaan kag magakinahanglan sang notaryo sang abogado.
Kun butigan ang report, sarang mangatubang sang kaso nga perjury kag violation sa Omnibus Election Code.
May-ara man sang naga-audit sa SOCE kun sa diin mahimo macheck ang paper trail sa mga tarpaulins kasubong man ang kontrata sa mga media entities sa mga publications.
Pahanumdom sini nga P5 ang natalana nga campaign budget para sa kada botante para sa mga independent candidate.
P3 per voter naman ang sa mga may partido, kag ang tagsa ka partido ang may P10 per voter nga campaign budget.
Tuyo man sang Comelec nga iduso nga himuon nga departamento ang pagreview sang SOCE agud mas mangin madasig kag mafilan sang kaso ang mga may paglapas, bangod sa karun ini ang opisina lamang.
Pahanumdom ni Macute nga sila sa Comelec ang tagapatuman lamang kag yara na sa mga mamalidha ang pag-amyenda sang Omnibus Election Code kun luyag nga pasakaan ang budget sa eleksyon, bangod aminado ini nga sadto pa ini nahuman kag tuman na ka layo ang karun nga mga presyo.
